Κυριακή 30 Σεπτεμβρίου 2012

ԵՐԵՔ ԾԱՂԻԿՆԵՐ




Աղուոր գիշեր մ' ուր կը զեղու հոգին`
Ցորեններու մէջ՝ կապտածաղիկին
Համբո՜յր մը տուի, համբոյր ջերմագին,
Ո՜վ դուք՝ որ կ'անցնիք, քաղեցի՞ք դուք զայն:

Թախծոտ էր հոգիս, երկինքըս տրտում,
Բայց ծաղիկներուն անոյշն էր բուրում,
Իմ սիրտըս դրի ես վարդի խորքում,
Ո՜վ դուք՝ որ կ'անցնիք, պիտի քաղէ՞ք զայն:

Սրած փուշին քով, ծարաւած թախծոտ,
Որ իր անձկութեամբ զիս քաշեց իր մօտ,
Վերքերըս թողուցի ես մելամաղձոտ.
Ո՜վ դուք՝ որ կ'անցնիք, ո՜հ, մի քաղեք զայն:



Ռուբէն Սեւակ

Δεν υπάρχουν σχόλια:

Δημοσίευση σχολίου