Δευτέρα, 1 Οκτωβρίου 2012

ԽՕՍՔ ԱՌԱՒՕՏԵԱՆ




Բացուիր, առաւօտ, քո լոյսը բարի,
Քաղենք արտերի բերքերն արեւառ,
Մարիր այս դաժան հրդեհն աշխարհի,
Տո՛ւր խաղաղ մեր կեանքն՝ ուրախ ու արդար:

Ուժ տուր, առաւօտ, դու մեր քաջերին,
Անփորձանք լինեն կռուի ճակատում,
Կորով տուր երկրի ամէն հնձուորին,
Ամէն բանուորին այս ահեղ մարտում:

Բացուիր, առաւօտ, թափ տուր մեր բազկին,
Մեզ աշխատելու կամք տուր առնացի,
Թափիր քո բարին ամէն մի հասկին,
Ու խաղաղ կեանքի դռները բացիր:

Մեր մանուկներին, արեւ տուր, հասակ,
Մեծանան նրանք առողջ ու տոկուն,
Նրանց հայրերին տուր կեանք, յաղթանակ,
Որ նրանք շուտով, շուտով դառնան տուն:

Բացուիր, առաւօտ, քո լոյսը բարի,
Քո հայեացքի տակ ժպտան արտ, արօտ,
Մարիր այս դաժան հրդեհն աշխարհի,
Բացուիր, առաւօտ, բացուիր առաւօտ:


Գեղամ  Սարեան

Δεν υπάρχουν σχόλια:

Δημοσίευση σχολίου